ԳԼՈՒԽ 5. ՀԱՃԱԽՈՐԴՆԵՐԻ ՆՈՒՅՆԱԿԱՆԱՑՄԱՆ ԵՎ ՊԱՏՇԱՃ (ՀԱՎԵԼՅԱԼ ԵՎ ՊԱՐԶԵՑՎԱԾ) ՈՒՍՈՒՄՆԱՍԻՐՈՒԹՅԱՆ ՆՎԱԶԱԳՈՒՅՆ ԿԱՆՈՆՆԵՐԸ
5.1 Ընկերությունը հաճախորդի հետ գործարար հարաբերություն կամ միանգամյա գործարք կատարելուց առաջ իրական շահառուի առկայությունը պարզվում է հաճախորդի հայտարարության հիման վրա (հավելված 2): Գործարար հարաբերության ընթացքում սույն կետով նախատեսված հայտարարության ձևը լրացվում (փոփոխվում) է միայն իրական շահառուի ի հայտ գալու կամ իրական շահառուի փոփոխության դեպքում:
Հաճախորդի նույնականացման ընթացքում ձեռք բերված տեղեկությունները պետք է ստուգվեն Սպասարկող ստորաբաժանման, իսկ անհրաժեշտության դեպքում նաև Ներքին դիտարկումների մարմնի և այլ ստորաբաժանումների ու աշխատակիցների կողմից: Ստուգումը պետք է ներառի այն տեղեկությունների ուսումնասիրումը, որոնք կբավարարեն հաճախորդի իրական ինքնությունը պարզելու համար: Այդ նպատակով Սպասարկող ստորաբաժանման կողմից կարող են օգտագործվել ինչպես փաստաթղթային, այնպես էլ ոչ փաստաթղթային ստուգման մեթոդներ:
Գործարար հարաբերությունում հաճախորդի պատշաճ ուսումնասիրություն իրականացնելիս Սպասարկող ստորաբաժանումը, իսկ անհրաժեշտության դեպքում Ներքին դիտարկումների մարմինը այլ ստորաբաժանումների ու աշխատակիցների հետ նվազագույնը`
- ստուգում է գործարքների միջև առկա փոխադարձ կապը, բացահայտում այդ կապի հնարավոր սխեմաները, ինչպես նաև որոշում, թե ինչ նպատակ ունեն նշված գործարքները.
- ստուգում է, թե արդյոք իրականացվող գործարքների էությունը համապատասխանում է հաճախորդի կողմից իրականացվող գործունեության տեսակներին.
- հավաքագրում է հաճախորդի եկամտի աղբյուրների վերաբերյալ հնարավոր տեղեկություններ.
- համադրում է հաճախորդի տարբեր գործարքներով շրջանառվող միջոցների աղբյուրները, շարժը, ծավալները.
- գնահատում է գործարքում կամ գործարար հարաբերությունում առկա ՓԼ/ԱՖ հնարավոր ռիսկերը` կասկածելի գործարքների ու գործարար հարաբերությունների հիմքերի և չափանիշների հետ համադրություն իրականացնելու միջոցով.
- ճշտում է որոշակի միավոր ժամանակահատվածում գործարքների տեսակները, հաճախականությունը և ժամանակագրությունը.
- իրականացնում է գործարքի կողմերի, ստացողի, իրական շահառուի, ինչպես նաև լիազորված անձի հաշվառում և իրականացնում համադրում հաճախորդների փոխկապակցվածությունը պարզելու նպատակով.
- առավել ամբողջական ու խորացված ստուգում է հաճախորդի հետ գործարար հարաբերություններ հաստատելիս պահանջվող փաստաթղթերի (տեղեկությունների) իսկությունը, օրինակ, պահանջելով հիմնավորող այլ փաստաթղթեր (տեղեկություններ).
- պահանջում է հաճախորդի ակտիվների և միջոցների ծագման աղբյուրների վերաբերյալ տեղեկություններ.
- տվյալների բազաներով կատարում է հաճախորդի, գործարար հարաբերության և գործարքի վերաբերյալ տեղեկությունների ուսումնասիրություն.
- հաշվետվություն տրամադրող այլ անձանց, այդ թվում` օտարերկրյա գործընկերներին հարցումներ է կատարում` ճշտելու հաճախորդի, նրա հետ գործարար հարաբերությունների և միանգամյա գործարքների վերաբերյալ տեղեկությունները.
- հաշվի են առնում Օրենքի և Լիազոր մարմնի խորհրդի կողմից հաստատված կանոնակարգի այլ պահանջներ:
5.2 Հաճախորդի պարզեցված ուսումնասիրությունը ֆիզիկական անձանց համար նվազագույնը ներառում է հետևյալ տեղեկությունների պարզումը և հաշվառումը`
- անունը, ազգանունը.
- անձը հաստատող փաստաթղթի տվյալները:
5.3 Հաճախորդի պարզեցված ուսումնասիրությունը իրավաբանական անձանց համար նվազագույնը ներառում է հետևյալ տեղեկությունների պարզումը և հաշվառումը`
- իրավաբանական անձի անվանումը.
- պետական գրանցման վկայականի համարը.
- ՀՎՀՀ
- բանկային հաշիվները տնօրինելու իրավասություն ունեցող անձին նույնականացնող տեղեկությունները:
Սպասարկող ստորաբաժանումը և Ներքին դիտարկումների մարմինը հաճախորդի հավելյալ ուսումնասիրություն իրականացնում է միայն բարձր ռիսկի չափանիշների առկայության դեպքում, միջին ռիսկի առկայության դեպքում իրականցվում է հաճախորդի պարզեցված ուսումնասիրության և հավելյալ ուսումնասիրության այն քայլերը, որոնք կբավարարեն անհրաժեշտ տեղեկատվության ձեռք բերման համար, իսկ պարզեցված ուսումնասիրությունը կարող է իրականացնել նաև ցածր ռիսկի չափանիշների դեպքում: